ONLINE ORDER
Muhammad Nadeem Bhabha
Search Haal | حال
Ghazlen - غزلیں

ہے مرے واسطے دعا مرا عشق

ہےمرے واسطے دعا مرا عشق
مجھ کو زرخیز کر گیا مرا عشق
تجھ کو ہی مانگنا نہیں آیا
میری جھولی تو بھر چکا مرا عشق
سب نے اپنی سلامتی مانگی
میں پُکارا کہ اے خدا مرا عشق
پہلے میں نور سے ہوا واقف
اور پھر مجھ پہ کھل گیا مرا عشق
وہم نے اختیار کی اِک شکل
پھر مرے دل میں آ بسا مرا عشق
یہ زیارت بھی ہے تلاوت بھی
ایک چہرے پہ ہے لکھا مرا عشق
میرے کمرے کی کائنات میں آ
نظر آئے گا جا بجا مرا عشق
تم الف لام میم میں ڈھونڈو
انہی حرفوں میں ہے چھپا مرا عشق