ONLINE ORDER
Muhammad Nadeem Bhabha
Search Haal | حال
Ghazlen - غزلیں

ہر دعا میری بے اثر تو نہیں

ہر دعا میری بے اثر تو نہیں
کہیں یہ ہجر عمر بھر تو نہیں
میں کسی اور چاک پر تو نہیں
تو کوئی اور کوزہ گر تو نہیں
اُس کی آنکھوں تک آ کے سوچتا ہوں
میں جدائی کی راہ پر تو نہیں
خود سے بھی تیز چل رہا ہوں میں
یہ مرا آخری سفر تو نہیں
تُو جسے شہر کہہ رہا ہے دوست
غورسے دیکھ یہ کھنڈر تو نہیں
اے مری ہجر سے بھری ہوئی نیند
عرصۂ خواب مختصر تو نہیں
شہر میں آگ لگ گئی ہے ندیمؔ
یہ خبر آخری خبر تو نہیں