Abhi tak kuch nahin badla

Jahan par tum ne chhoda tha
Wahin maujood hoon shayad bahut mahdood hoon
Dekho abhi tak kuch nahin badla
Mere bistar pe wohi raat takiye se lipat kar ro rahi hai
Jis ka hum ne wasl ki shab naam rakha tha
Mere kamre ki ik deewar pe tasweer mein woh shaam ka manzar
Tumhari yaad mein dooba hi rehta hai
Aziyat se bhara ik dukh
Abhi tak mez par rakhe hue kaaghaz ke tukde par pada hai
Jo muhabbat ke kisi bhi aakhri jumle mein hota hai
Muhabbat aur nafrat ka har ik lamha mere seene mein rakha hai
Na jaane jurm kya hai aur kaisi qaid hai jis mein
Main apne jism ka har ek hissa qaid pata hoon
Chaloon to paon mein waadon ki zanjeerein khanakti hain
Kahin bhi ja nahin sakta
Abhi tak kuch nahin badla
Jahan par tum ne chhoda tha
Wahin maujood hoon shayad bahut mahdood hoon