عشق میں ہارے ہوئے جسم

اقبال کہہ گئے کہ علم کی انتہا حیرت ہے، عشق کی انتہا کیا ہے؟ اس بارے میں سوچنا ہی غالبا سادگی کے زمرے میں آتا ہے۔۔۔ مجھ ایسے گنہگار ذرہ کم ترین کے نزدیک ایک لامتناہی خوف۔ لرز اٹھتا ہوں یہ سوچ کر کہ ندیم بھابھہ کی مسلسل پھیلتی انا اسے کہاں ہے جائے گی خاک کیا خاک بھر پائے گی اس بے پایاں شگاف کو، جس میں جتنی مٹی ڈالیں اس سے کئی گنا زیادہ بڑھ جاتا ہے۔ ایک تو منہ میں جاہ و حشمت کا پیدائیشی چمچہ۔۔۔ اس پر طبیعت مائل بہ تلاشِ حق، مزید برآں انا کا حجم ایسا کہ اللہ کے سوا کس کو طاقت کہ اسے بھر پائے اور پھر ہاتھ میں شاعری کا فن۔ معاملہ نہ کسی رفیق کے ہاتھ میں، نہ کسی استاد کی قدرت میں اور نہ ہی ندیم کے اپنے بس میں، رحم کرے تو وہ جو رحیم اور کریم ہے۔

زیرِ نظر مجموعہ کا ایک بڑا حصہ ندیم کے شائع شدہ مجموعہ ہائے کلام پر مشتمل ہے سو ندیم کی شاعری کا حال میں یکجا ہونا قارئیں اور نقادوں کے لئے جو جو سہولت رکھتا ہے وہ اپنی جگہ لیکن اب تک کے کل کلام کی گواہی اس کی اپنی ذات اور معانی کے لیے از حد ضروری ہے۔