Tum ne koi khat nahin likha

To tum naraz ho mujh se
Khata to ek thi lekin saza itni ke poora saal
Yaani teen sau painsath dinon se tum ne koi khat nahin likha
Tumhein maloom hai main teen sau painsath dinon mein
Kin azaabon mein raha hoon
Tumhein maloom hi kya za'am jab bhi toot ta hai to
Muhabbat be-yaqeeni ki sadak par chalne lagti hai
Bahut se wahme deemak ki soorat aadmi ko chaat lete hain
To dil bhi toot jata hai
Tumhein maloom ho shayad
Daroon-e-jism jab kuch toot ta hai to
Koi aawaz bhi paida nahin hoti
Zara si der ko bas nabz rukti hai andhera phail jata hai
Tashaddud se bhare tanhai ke lamhe
Qiyamat ban ke aise toot te hain
Jis tarah patthar baraste hain
tumhein maloom hi kya intezar-e-khat mein
Aankhein sard galiyon mein thithar kar marne lagti hain
Meri peshani par rekhon ki soorat sadayein raqs karti hain
Dishayein tanz karti hain
Agar tum khat nahin likh sakte to phir khud palat aao
Tumhein main aur mere gaon ki
Zaeef-ul-umr galiyan yaad karti hain