Udasi barhne lagti hai

Kisi ki yaad mein gum-sum thaki haari
Sitaron ke nagar se shaam jab bhi laut aati hai
Meri aankhon ke weeran sehan mein sar ko jhukaye chalne lagti hai
Udasi barhne lagti hai
Mere kanon mein jab bhi wasl ke lamhon ki
Ik aahat si aati hai
To meri hijr-aalooda si palkon par sitare jaag uthte hain
Kisi ki shakl banti aur bikharti hai
Udasi barhne lagti hai
Kabhi jab un-ginat sadiyon se chalte qafilon ka silsila
Mujh tak pohanchta hai
To hijrat paon se sargoshiyan si karne lagti hai
Udasi barhne lagti hai
Udasi jab bhi barhti hai
To mujh ko dil ke be-maqsad dareechon, taaqchon se jhankti hai
Aur mere honton ki khamoshi se mujh ko maangti hai
Mere seene pe phir ye wahshiyana raqs karti hai
Ye mere jism ke katbe pe koi lafz likhti hai
Udasi roz barhti hai