Zindagi Ko Churanay Chaltay Hain

Unhi galiyon se jin pe bachpan mein
Narm poron se lafz kaadhe the
Lafz jin ke ma’ani apne the
Juz humare na jaanta tha koi
Aaj woh lafz uthane chalte hain
Zindagi ko churane chalte hain

Zindagi ko churane chalte hain
Un darakhton ki chaal se jin par
Waqt ka gyaan likha karte the
Bachpane ke woh bakht zinda hain
Aaj tak woh darakht zinda hain
Tehniyon ko hilaane chalte hain
Zindagi ko churane chalte hain

Zindagi ko churane chalte hain
Zindagi ki dukaan se pehle
Ek gali seedhi simt jaati hai
Mod ke aakhri kinare par
Ek diya be-sabab sa rakha hai
Us diye ko jalaane chalte hain
Zindagi ko churane chalte hain