جیسا ہوں ، جس حال میں ہوں ، اچھا ہوں میں

جیسا ہوں ، جس حال میں ہوں ، اچھا ہوں میں
تم نے زندہ سمجھا تو زندہ ہوں میں
کھلے ہوئے دروازوں پر دستک مت دو
اندر آ جاؤ پہچان چکا ہوں میں
اور کوئی پہچان مری بنتی ہی نہیں
جانتے ہیں سب لوگ کہ بس تیرا ہوں میں
جانے کس کو راضی کرنا ہے مجھ کو
جانے کس کی خاطر ناچ رہا ہوں میں
دل کے کعبے میں دو چار صنم بھی ہوں
ایک خدا کے ساتھ بہت تنہا ہوں میں
اب تو یہ بھی یاد نہیں کہ محبت میں
کب سے تیرے پاس ہوں اور کتنا ہوں میں
اک آواز کے آتے ہی مر جاؤں گا
اک آواز کے سننے کو زندہ ہوں میں